Gwahoddiad

Dewch i ddathlu pen-blwydd y Gymdeithas Hanes! Mae croeso cynnes i bawb.

Mae’n 80 mlynedd eleni ers sefydlu Cymdeithas Hanes yr Eglwys Fethodistaidd yng Nghymru. Pan gynhaliwyd cyfarfod cyntaf y Gymdeithas yn 1946, fe ddadorchuddiwyd llechen ar “garreg Wesley” yn Neuadd y Farchnad, Llanidloes, i gofio am deithiau John Wesley drwy Gymru. Y neuadd eiconig hon yw’r unig enghraifft sydd wedi goroesi yng Nghymru o neuadd marchnad ffrâm bren.

LLUN GAN EIRIAN EVANS

Dyddiad a digwyddiadau’r dathlu

Bydd y Gymdeithas yn cyfarfod yn Llanidloes ar 16 Mai.

Am 1pm byddwn yn dod ynghyd ger y gofeb wrth Neuadd y Farchnad ar gyfer gwasanaeth byr.

Yna symud ymlaen i Gapel y Bedyddwyr a chael adloniant gan gorau a band lleol. Hefyd fe gawn baned – rydym yn ddiolchgar iawn i gyfeillion y capel am eu parodrwydd i’n croesawu.

Yn dilyn hynny, edrychwn ymlaen at ddarlith gan yr hanesydd Dr Eryn White.

I gloi’r diwrnod, bwriadwrn gael pryd o fwyd gyda’n gilydd.

Trefniadau teithio

Gobeithio y daw llawer o gyfeillion ynghyd o bell ac agos. Beth amdani? Trefnwyd bws bach a fydd yn cychwyn o Gaernarfon ar hyd yr A470. I archebu lle ar y bws, cysylltwch yn ddi-oed â Robin Jones 01248 670140/07780 869907 – cyntaf i’r felin…!

Rhowch wybod os gwelwch yn dda faint sy’n gallu dod o’ch ardal chi, er mwyn hwyluso’r gwaith trefnu.